IPAC Ta Yi Gargadi Kan Zargin Tara Katunan Zaɓe a Katsina

Katsina Times

Ana fargabar yiwuwar sayen ƙuri'u a Jihar Katsina gabanin babban zaɓen shekarar 2027, biyo bayan zarge-zargen cewa wasu 'yan siyasa na karɓar katunan zaɓe na dindindin (PVCs) daga hannun al'umma ta hanyar yi musu alkawarin shigar da su cikin shirye-shiryen tallafin gwamnati ko na wasu 'yan siyasa.

Rahotanni sun nuna cewa ana zargin masu wannan ɗabi'a da mayar da hankali kan masu ƙaramin ƙarfi, musamman mata da mazauna yankunan karkara, lamarin da ya jawo hankalin masu sa ido kan zaɓe da ƙananan jam'iyyun siyasa.

Da yake magana bayan wani muhimmin taro a Katsina, Shugaban Majalisar Shawarar Jam'iyyun Siyasa ta Jihar Katsina (IPAC), Alhaji Salisu Lawal Boyi, ya buƙaci al'umma su guji duk wani nau'i na sayen ƙuri'u da amfani da kuɗi wajen rinjayar masu zaɓe.

Ya ce wasu mutane na tunkarar al'umma, musamman mata, da alkawarin ba su tallafi, inda ake zargin suna amfani da damar wajen karɓar katunan zaɓensu.

Boyi ya gargaɗi jama'a da cewa katin zaɓe muhimmin kayan aiki ne da ke ba su damar amfani da haƙƙinsu na dimokuraɗiyya, don haka bai kamata su sayar da shi ko miƙa shi ga wani ba.

Advertisement

Ya kuma bayyana cewa IPAC ba za ta goyi bayan wani ɗan takara na musamman a zaɓen 2027 ba, sai dai za ta ƙarfafa wa al'umma gwiwa su zaɓi 'yan takara bisa la'akari da ayyukansu da amincinsu.

Sayen katin zaɓe laifi ne — Masani

A nasa ɓangaren, Malam Ahmad Ibrahim Karaf, na Ƙungiyar Democratic Sustainability Initiative Network, ya yi gargaɗin cewa saye da sayar da katunan zaɓe manyan laifuka ne a ƙarƙashin dokar zaɓe ta Najeriya.

Karaf ya kuma yi kira ga 'yan siyasa da su guji yunƙurin tara katunan zaɓe na jama'a, yana mai cewa bunƙasar fasahar zaɓe ta sa irin wannan hanya ta zama marar amfani.

Ya bayyana cewa tsarin tantance masu zaɓe na hukumar zaɓe mai zaman kanta ta ƙasa (INEC), wato Bimodal Voter Accreditation System (BVAS), yana amfani da tantance sawun yatsu da fuskar mai zaɓe.

A cewarsa, kasancewar katin zaɓen wani mutum a hannun wani ba ya ba shi izinin kaɗa ƙuri'a a madadinsa, domin tsarin BVAS yana tantance ainihin mai zaɓen kafin ya samu damar kaɗa ƙuri'a.