Auwal Isah Musa | Katsina TIMES
A ranar Alhamis, 19 ga Yunin 2025, an gudanar da bikin rantsar da sabbin shugabannin kungiyar matasa ta National Youth Congress (NYC) reshen jihar Katsina a cikin wani taro mai armashi da ya samu halartar manyan baki da dama. Taron, wanda aka shirya a dakin taro na Bello Kofar Bai da ke cikin Sakatariyar Jihar Katsina, ya samu halartar wakilai daga kungiyoyin al’umma, jami’an gwamnati, hukumomin tsaro da sauran masu ruwa da tsaki.
Bikin dai ya kasance wani muhimmin mataki wajen kaddamar da sabon tsarin shugabancin matasa a jihar, karkashin jagorancin kwamitin kaddamar da reshen jihar. Baya ga rantsar da shugabannin, taron ya kasance dandalin ilmantarwa da tunatarwa ga matasa kan mahimmancin jagoranci mai nagarta da kuma rawar da suke takawa a ci gaban al’umma.
A madadin Shugaban Ma’aikatan Fadar Gwamnatin Jihar Katsina, Hon. Abdulkadir Mamman Nasir, Mataimakin Shugaban Ma’aikatan ne ya gabatar da jawabin babban bako. A cikin jawabin nasa, ya bukaci sabbin shugabannin da su rungumi gaskiya, rikon amana da shugabanci na kowa ba tare da nuna bambanci ba. Ya kuma jaddada cewa gwamnati tana sa ran za su zama jakadu na gaskiya, haɗin kai da ci gaba a tsakanin matasa.
“Ina kira gare ku da ku zama abin koyi ga sauran matasa. Ku jagoranci da gaskiya, ku gina haɗin kai, kuma ku kasance masu sadaukarwa wajen kawo canji mai ma’ana a tsakanin al’umma,” in ji shi. Ya kuma yi addu’ar Allah Ya jagoranci sabbin shugabannin a cikin aikinsu.
Baya ga rantsarwar, taron ya samu gabatar da muhimman makaloli daga masana da kwararru kan shugabanci da zamantakewar al’umma. Wadanda suka gabatar da jawabai sun hada da Dr. Kabir Umar Musa daga Jami’ar Umaru Musa Yar’adua (UMYU), Aliyu Nasir Kankara daga KISTIM, Dr. Jamilu M. Abdulsalam, da Aminu Yusuf Dikko. Makalolin nasu sun tabo batutuwa masu muhimmanci kan dabarun shugabanci, muhimmancin mu’amala da al’umma da kuma tasirin matasa a tsarin ci gaban kasa.
A nasa jawabin na karɓar jagoranci, sabon shugaban kungiyar, Muhammad Muhammad Mono, ya yi alkawarin gudanar da shugabanci na gaskiya da bude kofa ga kowa. Ya ce ba za a yi amfani da matsayin shugabanci wajen nuna banbanci, son kai ko tsangwama ba.
“Muna da niyyar kafa sabuwar kungiyar matasa da za ta kasance garkuwa ga kowa. Za mu yi aiki tare da juna domin kai kungiyar zuwa kololuwar nasara,” in ji Mono. Ya kuma bukaci haɗin kai daga sauran shugabannin da aka zaba tare da goyon bayan dukkan matasa domin cimma nasarar da ake bukata.
Yayin da wannan sabon shafi na shugabanci ke farawa, ana sa ran sabbin shugabannin za su kafa tarihi ta hanyar zama zakakuran jagorori, masu kishin kasa da sadaukar da kai don ci gaban matasa da al’umma baki ɗaya.
